Arturs Rubenis. 1927. Dramaturgs, teatra darbinīks, bibliotekars

Foto nu gruom. „Latgales kultūras darbinieki”, 2. siej., 2008

     5. junī 85. dzimšonys dīnu sviņ dramaturgs i teatra darbinīks, Andryva Jūrdža fonda laureats Arturs Rubenis. 30 dorba godus jis nūstruoduojs bibliotekā, dorbuojīs ari kai pedagogs, teatra spieliešonā īsaistūt jaunuotni i vuicūt tai izpratni par teatra muokslu.

 

     Dzeivis ceļš A. Rubeņam īsasuocs Bieržgaļa pogostā, suokuma izgleiteiba apgiuta Viļānu pamatškolā, Varakļuonu pamatškolā i gimnazejā, biegļu gaituos Vuocejā pabeigta Iceho Latvīšu biegļu nūmetnis gimnazeja.

 

     Dzeivuodams ASV, A. Rubenis ir īgivs augstuokū izgleiteibu teatra jūmā i bejs cīš aktivs teatra darbinīks, daudz rokstu par trymdys latvīšu teatra izruodem publiciejs presī, sarakstejs vairuokys gruomotys par teatra vaicuojumim.

 

     Teatru vajadzeibom pats ari sarakstejs vairuok nakai 70 lugu gon latvīšu literarajā volūdā, gon latgalīšu rokstu volūdā, tuos izdūtys kai kruojumūs, tai atseviški. Pošys pyrmuos lugys raksteitys jau bierneibā, pyrmuo izvastuo luga – „Jaunuo audze” (Vuocejā). Par lugu kruojumu bārnim „Tykumeni sudobreņu vyzynoj” sajiems A. Jūrdža fonda gūdolgu. Tulkuojs lugys nu lītuvīšu i angļu volūdys. Kai akters i režisors pīsadalejs apmāram 40 izvadumūs.

 

     20. godsymta 90. godūs suocs skaiteit lekcejis par dramaturgeju Rēzeknis Augstškolys studentim, augstškolā nūdybynuojs studentu teatri. Organiziejs i vadejs latgalīšu dramaturgu seminarus, reikojūt saītus Rēzeknī i Bieržgalī. Bieržgaļa seminaru daleibnīkim veiduojs lugu raksteišonys problemom i praksei veļteitu izdavumu „Bēržgola Dramaturgs”.

 

Artura Rubeņa biografeja goda skaitļūs

1927 Dzims Bieržgaļa pogosta Sylaunīkūs

1944 Devīs biegļu gaituos iz Vuoceju

1948–1949 Studiejs baltu filologeju Baltejis univeristatī Pinebergā

1950 Devīs iz ASV

1954 Emersona koledžā Bostonā īgivs bakalaura gradu dramā

1956 Bostonys universitatī īgivs muokslys magistra gradu režejā

1958 Rītumu rezervis universitatī īgivs magistra gradu bibliotekzynuotnī

1959–1989 Struoduojs par bibliotekaru

1965 Zīmeļamerikys Latvīšu teatru apvīneibys vaļdis lūceklis, ari prīkšnīks (1965–1971, 1979–1984)

1965–1979 Zīmeļamerikys Latvīšu teatru apvīneibys apkuortroksta redaktors

1967–1983 Rokstu kruojuma „Skatuve” redaktors

 

Artura Rubeņa gruomotys par teatri

1968 „Piezīmes aktiera gramatikai”

1981 „Rakstīsim skatuvisku lugu”

1987 „Pašiem savs teātris” (leidzautors – Vitolds Kārkliņš)

2000 „Režijas pamati skolotājiem un pašdarbniekiem”

 

     --- Artura Rubeņa dorbi Rēzeknis bibliotekuos

 

Informaceja sagataveita,

izmontojūt bibliotekys nūvodpietnīceibys materialus

 

0
0
0
s2smodern
powered by social2s

Latviski По-русски | beta test Latgaliski

Citats

     Dzeive ir ceļš. Na vysod vīgls i navysod leidzons. Nazkod ir juopījam lāmums kuopt kolnā, koč palikt sovā īrostajā vīteņā byutu tik vīglai i pateikamai.
     (I. Sperga.) 

Volūda

 

Latgaliski cytur