Latgolys lingvoteritorialuo vuordineica

     2013. goda 22. februarī Rēzeknis Centraluo biblioteka duovynuojumā nu Rēzeknis Augstškolys sajēme Eiropys Socialuo fonda finansātuo projekta „Teritorialuos ideņtitatis lingvokulturologiskī i socialekonomiskī aspekti Latgolys regiona atteisteibā” (2009–2012) ītvorūs izstruoduotū „Latgolys lingvoteritorialū vuordineicu”, kurā popularzynuotniskā volūdā skaidruota Latgolys kulturys telpys sovpateiba.

 

     Ituos vuordineicys tapšonā ir pīsadalejs 23 autoru kolektivs, kas puorstuov humanitaruos i socialuos zynuotnis. Vuordineicai ir enciklopedisks raksturs, škirkļu aproksti tymā dūti 4 volūduos: latgalīšu, latvīšu, angļu i krīvu. Sova leluo apjūma dieļ vuordineica ir izdūta divūs siejumūs: 1. siejums latvīšu i krīvu volūdā, 2. siejums – latgalīšu i angļu volūdā.

 

     Kai pastuosteja gruomotys zynuotniskuo redaktore Ilga Šuplinska, „tei ir pyrmuo taida tipa vuordineica Latvejā, metodologejis ziņā ari plašuokā areālā, kas snādz Latgolai rakstureigu zeimu, simbolu skaidruojumu viesturiskā, folklorys i myusu dīnu perspektivā. Nūteikti juoatzeimej, ka vīns nu vuordineicys izaicynuojumim beja ari tulkuojums. Eipaši latgalīšu volūdā, kū tulkuotuoji – Sandra Ūdre i Ivars Magazeiņs – normēja i kuortuoja gondreiž kotrā puslopā.”

 

     Vuordineica ir boguotynuota ar daudzveideigu ilustrativū materialu i ļaun latgalīšim pošim pasavērt iz sevi nu molys. Kai soka cylvāki, kas jau ir paškurynuojuši itū izdavumu, – cīš vierteiga gruomota, kas kai lels duorgums juogloboj ari nuokamajom paaudzem!

 

 

     Rēzeknis Centraluo biblioteka itymā reizī duovynuojumā nu Rēzeknis Augstškolys sajēme ari humanitarūs zynuotņu žurnala „Via Latgalica” 4. numuru, „Latgalistikys kongresu materialu” 4. numuru i latgalīšu rakstnīka Ontona Rupaiņa dzeivei i daiļradei veļteitū dokumentalū filmu „Laiku i myuža roksti”.

 

     Sokom paļdis augstškolai par vierteigū duovynuojumu! Jau dreizumā – kod byus paveikts bibliografiskuos apstruodis process – duovona byus apsaverama jaunumu plauktā i pīejama izmontuošonai bibliotekys skaiteituojim.

 

     Vaira par projektu „Teritorialuos ideņtitatis lingvokulturologiskī i socialekonomiskī aspekti Latgolys regiona atteisteibā” skaitit ite.