Foto nu gruom. „Latgales kultūras darbinieki”, 1. siej., 2008

     30. oktobrī opola jubileja palīk Bonifacejam Briškam – publicistam i rakstnīkam, kurs sovā dzeivī struoduojs vysaidus dorbus – bejs školuotuojs i puorziņs školā, struodojs iz teiruma i byuvnīceibā, bejs apkūpiejs, agronoms, bibliotekars i elektriks…

 

     Pyrmuos publikacejis presī B. Briškam bejušys jau studeju laikā Pīterpilī krīvu volūdā. Latvīšu volūdā suocs publicētīs „Zīdūnī” i „Latgolas Vōrdā” (suokumā sovus rokstus nav parakstejs), juo teksti ir bejuši skaitami ari „Latgolas Zemkūpī” i „Zemnīka Ziņuos”. Publiciejs gon nūpītnus apceriejumus, gon ospruoteigus feļetonus. Pseidonimi – Striču Joseļs i Tarzans.

 

     Trymdys laikā dorbuojīs „Latgolas Bolsā” i „Dzeivī”, daudz publikaceju rokstu kruojumā „Acta Latgalica”, bejs vīns nu Latgaļu pietnīceibys instituta izveiduošonys rūsynuotuojim, dorbuojīs „Latgalīšu raidejumu komitejā”, pietejs Latgolys viesturi. Sasnīdzūt sešdesmit godu vacumu, suocs studēt bibliotekzineibys.

 

Bonifaceja Briškys biografeja goda skaitļūs

1902 Dzims Varakļuonu pogosta Kozsolys cīmā

1916–1918 Vuicejīs Pīterburgā

1918 Atsuocs vuiceitīs Rēzeknis piļsātys školā

1920–1923 Vuicejīs Rēzeknis Vaļsts vydusškolā

1923 Beidzs školuotuoju sagataveišonys kursus Jelgovā

1923–1925 Struoduojs Bieržgaļa sešklaseigajā školā

1924–1928 Studiejs Latvejis Universitatis Medicinys fakultatī

1928 Pyrmuo atrostuo paraksteituo publikaceja (roksts „Laika nūteikšona” žurn. „Latgolas Zemkūpis”)

1928–1940 Struoduojs Zemkūpeibys ministrejā

1935–1940 Studiejs Latvejis Universitatis Lauksaimnīceibys fakultatī

1940 Sajiems agronoma gradu

1940–1941 Struoduojs par tulku i agronomu

1944 Devīs biegļu gaituos iz Vuoceju, struoduojs par školuotuoju latvīšu biegļu nūmetnī

1950 Minhenī īvālāts par Latvīšu katuoļu organizaceju savīneibys prezideja prīkšsādātuoju

          Puorsacieļs iz ASV, tī struoduojs par teiruma struodnīku, apkūpieju, byuvstruodnīku, elektriku

1957 Sarakstejs gruomotu „Latgali politiskajuos patmaļuos”

1965 Ņujorkys štata universitatī īgivs magistra gradu bibliotekzynuotnī

          Izdūta gruomota „Humoreskas”

1965–1973 Struoduojs Ņujorkys štata universitatis bibliotekā

1984 Izdūta gruomota „Latgola – muna tāvzeme”

1994 Mirs Olbani, Ņujorkys štatā

 

Bonifaceja Briškys publikacejis periodikā (piļnī teksti)

 

Informaceja sagataveita,
izmontojūt bibliotekys nūvodpietnīceibys materialus