Foto nu gruom. „Latgales kultūras darbinieki”, 2. siej., 2008

     Pyrms 120 godim 21. julī dzims latgalīšu dzejnīks Seimaņs Putāns, kura pyurā ir vairuoki simti dzejūļu, kas paraksteiti ar vairuokim desmitim vysaidu pseidonimu. Koč juo dorbūs i natryukst naveikleibys, naizkūptu formu i solkonuma, dzejnīkam ir pīmits talants i juo daiļradis suokumā saraksteituo dzeja atzeita par saistūšu i aizkustynuojumu raisūšu, tauta ar atzineibu pījāmuse i labi saprotuse dzejūļus par naizgleituotūs i nabadzeigūs ļaužu vuorgim.

 

     S. Putāns ir personeiba, kura sevī nasuse skumis i tragismu, kas atsaspūguļuojs gon juo dzeivis guojumā (jau agrā jauneibā spīsts puorjimt saimnīceibys vadeišonu, napīteikama izgleiteiba, atlaists nu dorba, naspiejs tikt uorā nu nabadzeibys, par dzejūlim sūdeits ar arestu cītumā, aviacejis izliduojumā sadaguse īdzeive i rūkroksti, smoga slimeiba…), gon daiļradis tematikā (osoru i bādu zeme Latgola, nabadzeigī ļauds i jūs cīsšonys, dzeive bez prīcys, nataisneiba) i literaruo dorba ceļā pi skaiteituoja (daļa gruomotu aizlīgta, antireligiskuos dzejis dieļ nūsavērse dīvbejeigī latgalīši).

 

     Labi S. Putānu raksturoj juo poša dzejis ryndys:

          „(..)
          Maņ pateik klauseitīs, kai cyti
          dzīd dzīsmes, pylnas skumeibas,
          maņ pateik klauseitīs, kai dzīsmēs
          apdzīd vōrgus, cīsšonas.
          Leidz nōvei skumšu ari es,
          leidz nōvei skumeigs staigōšu,
          un laikā īdvasuma dzīsmes
          es pylnas skumes dzīdōšu.”

 

Seimaņa Putāna biografeja goda skaitļūs

1892 Dzims Malinovys (tagad – Bikernīku) pogosta Līpinišku dzeraunī pi Daugovpiļs

1910 Beidzs Bikernīku Ministrejis školys divys klasis

1912 Pyrmuo publikaceja avīzī „Dryva” (dzejūļs „Kometa”)

1913 Īsaukts karadīnastī, dīniejs Sibirejā

1917 Piec īvainuošonys karā atsagrīzs Latvejā, piec tam nu jauna mobilizāts, pīsadalejs pylsūņu karā Sorkonarmejis pusī

1919 Dzejūli publicāti komunistu avīzī „Taisneiba”

1921 Piec atsagrīzšonys Latvejā struoduojs par kurjeru slymūs kasī Rēzeknī

1921–1934 Latgalīšu i krīvu volūdā saraksteitī dzejūli publicāti žurnalūs „Zīdūnis”, „Reits”, „Latgolas Škola” i avīzēs „Jaunō Straume”, „Latgolas Dorbs”, „Trudovaja misļ” i c.

1926–1929 Struoduojs par dzeļžaceļa sorgu Daugavpilī

1929–1932 Struoduojs Talsūs

1932–1933 Struoduojs Tukumā

1933–1942 Struoduojs Rucavā

1942–1944 Struoduojs Jelgavā

1954 Piec pieckara godu dorba Rēzeknis mežsaimnīceibā i Reigā Vaļsts bankā (sorgs) pensejis godūs suocs dzeivi Makašānu pogosta Jurku dzeraunī

1960 Rakstnīku savīneibys bīdrs

1969 Mirs, paglobuots Mīra īlys kopūs Rēzeknī

 

Pyrmuo S. Putāna publikaceja
olūts: http://data.lnb.lv/nba01/Drywa/1912/Drywa1912-114.pdf

 

Seimaņa Putāna gruomotys

1922 „Dūmas un nūpyutas”

          „Dainas myusu jauneibai”

1924 „Tovā vōrdā”

1927 „Latgolas orōja bolss”

1931 „Stoni Latgaliji” (krīvu vol.)

1932 „Dīva apsavēršona”

          „Ternistij putj” (krīvu vol.)

1936 „Ļaunōkais ciļvēces īnaidnīks”

1949 „Dzejas”

1960„Tovā vōrdā”

(Manuskriptā palykuse epigrammu, sentenču i aforismu izlase „Dzeives ceļā”)

 

Seimaņa Putāna pseidonimi (nalela daļa): Apmōneitais, Apsmītais, Čangalāns, Dryumais dzejnīks, Elektrons, Katōļs, Malinovīts, Orōjs, Vīntulis, Zemnīks

 

Informaceja sagataveita,

izmontojūt bibliotekys nūvodpietnīceibys materialus